Bechos

Bechos é a nova serie de animación para primeiros espectadores producida por Undodez para a Televisión de Galicia. Dirixido por Andrés e Laura Mahía sobre os deseños desta última, Bechos achéganos, a través das aventuras de catro animaliños, valores como o respecto pola natureza, a necesidade de compartir e reciclar e a importancia da amizade. Coas voces de Xosé A. Touriñán, Marita Martínez ou Patricia Castrillón entre outras actrices e actores, esta nova aventura animada é unha aposta da televisión pública polos contidos en galego para a rapazada. As aventuras de Xurxo, Xiana, Catuxa e Margarida poden seguirse xa na canle de Youtube da Televisión de Galicia, na app do Xabarín e na web da CRTVG.